Keka Judge Fullen Anicete

by Amor C. de Jesus

Juez yang mituringan, king kekaba na ning bie na
Uling malwat menungculan alang matsurang gewa na
Detang taung makadalum a mamarap king Sala na king balen ning Santo Tomas at Minalin a pagsilbyan na, mididinan lang justicia at pareas ing lawe na.
Gewa na ing catungculan, uling biasa ya caring batas at ilang meging giya na.
E na lalun ing bili mu, ma-influencia o makwalta, at caring decision na bucud mu ding ebidencia yla retang tutukian na.

Familya nang caluguran, pepakit na ing lingap na
Uling angga king tauling inawa, e kinupas ing lugud na
Lalu na kang Natividad, ing maganaca nang asawa
Labis-labis ing panirug matyagang menese kaya
Ena alos atanggap-tanggap ing macu at lakwan nala detang anac at apo na a mal dili ketang bie na.
Ngeni ing catataulian muli at marap ne ketang miglalang kaya.

Anya balen Capampangan pasalamat ka't kilala
Ning maningning a licwan na at agawa king balayan
Itang Knights of Columbus nung nucarin mig Grand Knight ca
Carela pepakit mu ing lugud pamanpalataya at mal mung Iglesya.
E wari maging Rotarian ca, Presidenting menungculan
Ticyan mu detang Four-Way Test detang apat a surian king pamicaparang tau at caring abe mung Rotarians.
Eulogy o tawling pamun ing buri ku sanang gawan ketang pamaglacbe mu ketang aliwang karinan:

Metung kang mayap a tau, Lider ning balen a tibwan,
Carapatdapat a Juez, maguinu at gagalang,
Modelu ding Cayanacan a dapat ping paciapusan.

At king sariling canacu O canacung caluguran
Judge Fullen Z. Anicete, era na ka acalingwan.